• Главная
  • Расписание богослужений
  • Информация для паломника
  • Контакты и реквизиты
  • Поминовения
  • Таинство Крещения

служба святителю Варлааму Махрищскому

Служба святителю Варлааму, епископу Суздальскому и Тарусскому, Махрищскому чудотворцу

Месяца августа, в 21 день

На вели́цей вече́рни

Блаже́н муж: 1-й антифо́н.

На Го́споди, воззва́х: стихи́ры Богоро́дицы,

и стихи́ры святи́теля, глас 6:

Ве́дая се́рдца Варлаа́ма ве́рнаго произволе́ние благо́е,/ его́же по предуве́дению зва́нных Бог предуста́ви// сообра́зна бы́ти о́бразу Сы́на Своего́/ и перворо́дна во мно́гих бра́тиях,/ того́же и призва́, того́ и оправда́,/ тому́же вручи́ пасти́ слове́сныя о́вцы Своя́,// того́же и просла́ви во Ца́рствии Небе́снем.

Днесь ликовству́ет и́ноков сосло́вие/ и вси христоимени́тии лю́дие,/ и́же собра́шася во оби́тели Стефа́на, вели́каго отца́,/ иде́же благодаря́ще славосло́вят Триипоста́снаго Бо́га,/ дарова́вшаго засту́пника но́ваго, Варлаа́ма достохва́льнаго,/ всем ве́рным, почита́ющим па́мять его́,// насле́дника святы́х во Ца́рствии Небе́снем.

Возлюби́в смире́ние преподо́бных отце́в,/ от ю́ности твоея́, свя́те Варлаа́ме,/ удали́лся еси́ бе́гая мудре́йших земли́ су́етныя му́дрости,/ и водвори́лся еси́ в пусты́ни,/ в не́йже не́когда Стефа́н ди́вный сад духо́вный насади́,/ и ю́же Се́ргий чу́дный стопа́ма свои́ма освяти́,/ тех моли́твами свет Богоразу́мия прия́л еси́,// и ны́не с ни́ми лику́еши во Ца́рствии Небе́снем.

Не то́чию оби́тель Стефа́нова тобо́ю сла́вится,// но еще́ же и земля́ Су́ждальская труды́ твоя́ благовеству́ет,/ я́ко во святи́тельстве благоче́стно пребыва́я,/ тща́нием твои́м свещу́ но́вую возже́гл еси́,// явле́й ми́ру по́двиги преподо́бныя Евфроси́нии,// с не́юже помяни́ нас во Ца́рствии Небе́снем.

По и́мени твоему́ та́ко и житие́ твое́:/сподо́бивыйся, свя́тче, сын Бо́жий1 нарещи́ся,/сыновства́ тезоиме́ние в ду́се стяжа́л еси́,// сего́ ра́ди во сла́ве О́тчей ны́не пребыва́я,/ научи́ и нас Еди́наго Бо́га иска́ти неле́ностно,/ да и мы, чту́щии тя, Варлаа́ме,// сы́ны Све́та нарече́мся во Ца́рствии Небе́снем.

Сла́ва, святи́теля, глас то́йже:

Ра́дуйся, святи́телю о́тче Варлаа́ме,/ и па́ки ра́дуйся, взыва́ем ти,/ я́ко тобо́ю даде́ся нам ве́лие ра́дование,/ чудотво́рный о́браз Пресвяты́я Богоро́дицы./ А́ще бо и отъя́ся о́ный за грехи́ на́ша,/ но ве́руем, я́ко хода́тайством твои́м, моли́твенниче наш,/ не лиши́т нас Де́ва Чи́стая// до конца́ Своея́ Ма́терния ми́лости.

И ны́не, Богоро́дицы.

Вход. Проки́мен дне. И чте́ния три.

На лити́и, стихи́ры святи́теля, глас 2:

Во дво́рех Госпо́дних, святи́телю Варлаа́ме,/прия́л еси́ Ду́ха И́стины,/ и Тем наставля́ем, ве́ры адама́нт яви́лся еси́,// и ны́не нас во упова́нии непосты́днем// заступле́нием твои́м утверди́.

Све́том трисо́лнечным озаря́ем,/ оби́тель Святы́я Тро́ицы возвели́чил еси́,/ в не́йже мо́щи твоя́ честны́я почива́ют ны́не,/// я́ко прибе́жище и кре́пкое огражде́ние.

Сла́ва, святи́теля, глас 8:

Святи́телю Варлаа́ме, о́тче наш,/ неботе́чною стезе́ю проше́л еси́,/ и Отца́ безнача́льна, Сы́на безле́тна, Ду́ха сопресто́льна испове́дал еси́,/ и ны́не сла́ву Бо́жию негада́тельно зря,/ во све́те невече́рнем ликовству́я,// не забу́ди нас предста́тельством твои́м.

И ны́не, Богоро́дицы.

На стихо́вне, стихи́ры Богоро́дицы

или́ святи́теля, глас 5.

Подо́бен: Ра́дуйся:

У́тренюя ду́хом, свя́те Варлаа́ме,// к све́ту Христа́ Жизнода́вца,/ неприча́стен тьмы грехо́вныя пребы́л еси́,// те́мже ны́не свети́льник Боже́ственныя сла́вы явля́ешися.

Стих: Честна́ пред Го́сподем// смерть преподо́бных Его́.

Ше́ствовав стопа́ми Стефа́на богому́драго,/у́мный би́сер, Христа́, обре́л еси́,/ и в Небе́сных кро́вех с преподо́бным водворя́яся,/ не оста́ви си́рыми вопию́щих ти:/ покажи́ и нас, Варлаа́ме свя́те,//// сонасле́дники ве́чныя ра́дости.

Стих: Что возда́м Го́сподеви о всех,/ я́же воздаде́ ми?

Заве́т блаже́ннаго отца́ испо́лнив,/ благода́рный сын яви́лся еси́;/ ме́ньшим бра́тиям усе́рдно послужи́в,/ преизя́щнейший явля́ешися./ И ны́не, свя́тче Варлаа́ме,/ я́ко дре́вле, ускори́ на по́мощь,/да никто́же, во оби́тель сию́ притека́яй,// никогда́же отды́дет тощ.

Сла́ва, святи́теля, глас 1:

Излия́ся благода́ть во устна́х твои́х, преблаже́нне,/ егда́ чернецу́ прорече́: не бу́ди неве́рен,/ Иису́с Христо́с вчера́, днесь То́йже и во ве́ки,/ и заступле́ние и́мамы Стефа́на, вели́каго отца́./ О, ве́лие дерзнове́ние твое́, свя́те Варлаа́ме,/ его́же Христо́с не посрами́,/ но ма́лыми хле́бы напита́ти мно́гия сотвори́./ Моли́ ны́не, да не оскуде́ет в воспева́ющих тя// дух ева́нгельския ве́ры.

И ны́не, Богоро́дицы.

На благослове́нии хле́бов, тропа́рь святи́теля, глас 4:

Я́ко звезда́ пресве́тлая земли́ Влади́мирстей// яви́лся еси́, святи́телю Варлаа́ме, преподо́бне о́тче:/ боголе́пно устроя́л еси́ оби́тель Тро́ицкую, я́же на Ма́хре,/ иде́же мо́щи Стефа́на чудотво́рца сла́вно обре́л еси́,/ ны́не же и твоя́ святы́я мо́щи нам чуде́сно да́руеши,/ да укрепи́тся всю́ду ве́ра Правосла́вная,// мно́гими благода́тными и спаси́тельными твои́ми моли́твами.

Сла́ва, и ны́не, Богоро́дицы.

На у́трени

На Бог Госпо́дь: тропа́рь Богоро́дицы два́жды.

Сла́ва, святи́теля. И ны́не, Богоро́дицы.

По 1-м стихосло́вии, седа́лен святи́теля, глас 1:

Благослове́нныя о́трасли пречестно́е прозябе́ние, Варлаа́ме, яви́лся еси́,/ в зако́не Бо́жием ста́рцем Серапио́ном насажде́нное,/ во дво́рех Госпо́дних, я́ко крин, процве́тшее,/ и фимиа́мом моли́тв твои́х мно́гия облагоуха́вшее./ Житие́ твое́ пра́ведно и успе́ние со святы́ми,// моли́ся о душа́х на́ших.

Сла́ва, и ны́не, Богоро́дицы.

По 2-м стихосло́вии, седа́лен святи́теля, глас 8:

Прииди́те, и́ноческаго ли́ка соприча́стницы, а́нгельскаго жития́ ревни́телие,/ возра́дуемся, помина́юще Варлаа́ма, блаже́ннаго отца́./ Той бо оби́тели Пресвяты́я Тро́ицы яви́ся удобре́ние/ и сосу́д избра́нный, Паракли́та селе́ние,// и ны́не мо́лит Тро́ицу Единосу́щную,/ немо́лчными гла́сы на Небеси́ пева́емую,/ о чту́щих честно́е его́ успе́ние.

Сла́ва, и ны́не, Богоро́дицы.

Велича́ние и псало́м избра́нный.

По полиеле́и, седа́лен святи́теля, глас 8:

Прииди́те, земноро́днии,/ ко Иерусали́му Го́рнему душе́ю устремле́ннии,/ просла́вим и́стиннаго граждани́на Гра́да Небе́снаго Царя́,/ святи́теля Варлаа́ма достоблаже́ннаго,/ в житии́ земне́м невозвра́тным по́мыслом/ восле́д Христа́ восте́кшаго,/ и ны́не моля́щагося Го́споду о душа́х на́ших.

Сла́ва, и ны́не, Богоро́дицы.

Степе́нна, 1-й антифо́н 4-го гла́са.

Проки́мен и Ева́нгелие Богоро́дицы

или́ святи́теля.

Сла́ва: Моли́твами святи́теля Варлаа́ма:

И ны́не: Моли́твами Богоро́дицы:

По 50-м псалме́, стихи́ра Богоро́дицы

или́ святи́теля, глас 6:

Насле́дниче Бо́жий, соприча́стниче Христо́в,/служи́телю Госпо́день, свя́те Варлаа́ме,/ по и́мени твоему́ та́ко и житие́ твое́,/ спросия́ бо седи́не ра́зум,/ свиде́тельствоваше све́тлость лица́ твоего́ душе́вное незло́бие,/ изве́ствоваше кро́тость сло́во молчали́вое./ Жи́знь твоя́ сла́вна, и успе́ние со святы́ми,// моли́ о душа́х на́ших.

Кано́ны Богоро́дицы и святи́теля.

Кано́н святи́теля, глас 1,

его́же краегране́сие без Богоро́дичнов:

Святи́телю Варлаа́му смире́нное приноше́ние.

Песнь 1

Ирмо́с: Твоя́ победи́тельная десни́ца/ боголе́пно в кре́пости просла́вися:/ та́ бо, Безсме́ртне,/ я́ко всемогу́щая, проти́вныя сотре́,// изра́ильтяном путь глубины́ новосоде́лавшая.

Припе́в: Святи́телю о́тче наш Варлаа́ме, моли́ Бо́га о нас.

Смире́ние се́рдцу и благода́ть устна́м пода́ждь ми, Сло́ве,/ я́ко во благодаре́нии разу́мно воспою́/ свети́льника но́ваго, Варлаа́ма достоблаже́ннаго,/земли́ Су́ждальския украше́ние и оби́тели Ма́хрищския похвалу́.

Варлаа́ме святи́телю, ста́ни с на́ми/ и благослови́ ми́ром но́вую па́ству твою́,/ исправле́ния бо и по́двиги твоя́ воспе́ти дерза́юще,/ просла́вим Го́спода сла́вы, предначина́юще ны́не сие́ торжество́.

Яви́лся еси́ прославле́ния ревни́тель и хода́тай,/ Стефа́на богому́драго со ученики́ Григо́рием и Кассиа́ном,/ еще́ же и гра́да Су́ждаля похвалы́, преподо́бныя Евфроси́нии,/ с ни́миже ны́не моли́ся о душа́х на́ших.

Твои́м доброде́телем вене́ц слове́сный плету́щия,/подража́тели о́ных, Варлаа́ме, покажи́,/ да и мы, чту́щии любо́вию святу́ю па́мять твою́,/ не лиши́мся ча́сти с тобо́ю в нестаре́емем житии́.

Измла́да благоче́стию пра́дедом твои́м науче́нный,/ и мона́шеское житие́ па́че кра́сных ми́ра сего́ возлюби́в,/ ревни́тель о сла́ве по́двигов вели́ких отце́в, Варлаа́ме, яви́лся еси́,/ и святи́тель и́стинный показа́лся еси́.

Богоро́дичен:

Влады́чице Чи́стая, ми́ру всесве́тлый покро́ве, уста́ моя́ облагодати́,/ и отры́гнути сло́во похва́льное, Де́во, сподо́би, избра́ннику и рабу́ Твоему́, Варлаа́му,/ и́же Тя досто́йно почти́.

Песнь 3

Ирмо́с: Еди́не, ве́дый челове́ческаго существа́ не́мощь/ и ми́лостивно в не́ вообра́жся,/ препоя́ши мя с высоты́ си́лою,/ е́же вопи́ти Тебе́, Святы́й,// одушевле́нный хра́ме неизрече́нныя сла́вы Твоея́, Человеколю́бче.

Те́сный и приско́рбный путь избра́ти изво́лив на земли́, Варлаа́ме,/ и бре́мя мно́гих трудо́в на ра́ме свое́м понести́,/ сего́ ра́ди стяжа́л еси́ у Христа́ дерзнове́ние ве́лие:/ моли́, богоно́се, ду́ши тя блажа́щих просвети́ти и спасти́.

Его́же от ю́ности возлюби́л еси́, Варлаа́ме,/ Его́же в се́рдце всели́ти всеусе́рдно потща́лся еси́,/ Его́же избра́нных жре́бия сподо́бился еси́,/ Христа́ Жизнода́вца моли́ о велича́ющих тя.

Любо́вию сыно́внею ко преподо́бному Стефа́ну распали́вся,/ ме́сто по́двигов блаже́ннаго благоукраси́л и возвы́сил еси́,/ и я́ко сокро́вище многоце́нное, мо́щи преподо́бнаго обре́л еси́,/ с ни́мже Престо́лу Бо́жию ны́не предстои́ши.

Ю́же, свя́те, Христо́с вручи́ тебе́ слове́сную па́ству,/ о́ну жезло́м моли́тв твои́х упаси́,/ и мир и благослове́ние Пастыренача́льника той испроси́.

Богоро́дичен:

Христа́, Бо́жие Сло́во, неизрече́нно роди́вшая,/ мрак прегреше́ний души́ моея́ потреби́,/ и се́рдца устремле́ние непрело́жно в любви́ Сы́на и Бо́га Твоего́ соблюди́.

Седа́лен святи́теля, глас 8:

Свети́льник пресве́тлый па́стве Су́ждальстей возсия́л еси́,/ о́браз Христа́ Светода́вца ве́рным, блаже́нне, явля́я./ Те́мже, Варлаа́ме, светоно́сную па́мять твою́,/ днесь соше́дшеся, празднолю́бцы лю́бовию ублажа́ем.

Сла́ва, и ны́не, Богоро́дицы.

Песнь 4

Ирмо́с: Го́ру Тя́, благода́тию Бо́жиею приосене́нную,/ прозорли́выма Авваку́м усмотри́в очи́ма,/ из Тебе́ изы́ти Изра́илеву провозглаша́ше Свято́му,// во спасе́ние на́ше и обновле́ние.

Ве́ру ко Христу́ несумне́нную, свя́тче, име́вый,/ непосты́ден предста́тель о си́рых позна́лся еси́/ и чудотво́рец и́стинный показа́лся еси́.

А́нгельски пожи́в на земли́, Варлаа́ме,/ ра́зум богопросвеще́нный стяжа́л еси́,/ и́мже Христа́ и Влады́ку своего́ познава́я,/ мудрова́нии су́етными непоколе́блен яви́лся еси́.

Ра́ди Бо́жия любве́, свя́те Варлаа́ме,/ нищеты́ во́льныя в ра́зуме не отврати́лся еси́,/ те́мже Христо́с тебе́ ра́ди от нищеты́ и гла́да оби́тель изба́ви.

Любо́вию преесте́ственною преиспо́лнен бысть, преблаже́нне,/ ду́хом любве́ подража́тель Стефа́на богому́драго быв,/ те́мже тя, Варлаа́ме, я́ко вои́стину насле́дника преподо́бнаго отца́ ны́не почита́ем.

А́ще и не возмо́жем по достоя́нию воспе́ти тя, пребога́те,/ оба́че с любо́вию пе́ние чад твои́х приими́,/ и во благи́х жела́ния серде́ц на́ших испо́лнити/ и ту́не пода́ти грехо́в оставле́ние всем нам Христа́ умоли́.

Богоро́дичен:

Прия́телище Бо́жия прему́дрости,/Богоро́дице, Ма́ти Всепе́тая,/ Твое́ заступле́ние раби́ Твои́ стяжа́вше,/ правосла́вно Тя велича́ем.

Песнь 5

Ирмо́с: Просвети́вый сия́нием/ прише́ствия Твоего́, Христе́,/ и освети́вый Кресто́м Твои́м ми́ра концы́,/ сердца́ просвети́ све́том Твоего́ Богоразу́мия,// правосла́вно пою́щих Тя.

Архиере́я и́стиннаго подо́бник яви́лся еси́,/ егда́ Дух Бо́жий показа́ тя святи́теля гра́ду Су́ждалю,/ те́мже лю́дие па́ствы твоея́, благода́рни су́ще,/ па́мять твою́, Варлаа́ме, ра́достию воспева́ем.

Мака́рия Первопресто́льника сорабо́тник показа́лся еси́,/ ревну́я о сла́ве подви́жников ве́ры/ и исправле́ния о́ных изве́стна явля́я./ Сего́ ра́ди, Варлаа́ме, слуго́ и дру́же святы́х,/ честну́ю па́мять твою́ ны́не любо́вию прославля́ем.

Умно́жил еси́ зла́то души́ твоея́, преблаже́нне,/ и сие́ Жизнода́вцу Христу́ прине́сл еси́,/ и я́ко до́брый раб, благи́й и ве́рный,/ в ра́дость Го́спода твоего́ лику́я вшел еси́.

С вы́шними ли́ки предстоя́, я́ко Бо́жий служи́тель,/ при́зри ми́лостивно на но́вую па́ству сию́/ и моли́ся, Варлаа́ме, святи́телю достохва́льне,/ о чту́щих пресве́тлую па́мять твою́.

Богоро́дичен:

Сла́вы Бо́жия свята́я ски́ние, Де́во Богороди́тельнице,/ мироде́ржца ле́стными прило́ги мя до́лу приклоне́ннаго,/ к высоте́ Небе́сней обрати́.

Песнь 6

Ирмо́с: Обы́де нас после́дняя бе́здна,/ несть избавля́яй,/ вмени́хомся я́ко о́вцы заколе́ния,/ спаси́ лю́ди Твоя́, Бо́же наш,// Ты бо кре́пость немощству́ющих и исправле́ние.

Мир ми́ру дарова́ти, свя́тче Бо́жий, моли́ся,/ ми́рен бо, кро́ток, прост пребы́л еси́ в житии́,/ те́мже по успе́нии твое́м блаже́нства пра́ведных насле́дник яви́лся еси́,/ и нам мо́щи твоя́ святы́я дарова́л еси́.

Иде́же призва́ тя Госпо́дь, досточу́дне,/ е́же во Авраа́мова не́дра прия́ти блаже́нную ду́шу твою́,/ та́мо днесь возсия́ богокра́сная па́мять твоя́, Варлаа́ме,/ и испо́лни празднолю́бцы весе́лия и ра́дования.

Ру́це твои́ простри́ ко Влады́це, богому́дре святи́телю,/ во е́же уще́дрити ме́сто, иде́же поко́ятся мо́щи твоя́,/ и всех к ним притека́ющих осени́/ ду́хом ми́ра Христо́ва и боже́ственныя любве́ твоея́.

Ева́нгельски после́дуя Христу́, Варлаа́ме,/всеусе́рдно во́лю Его́ испо́лнил еси́,/ еще́ же и заве́том дру́га Бо́жия, преподо́бнаго Стефа́на, ве́рен пребы́л еси́,/ его́же по́двигов сла́ву церко́вную тобо́ю Госпо́дь ми́ру яви́.

Не премолчи́, святи́телю, за ны ко Го́споду,/ и не преста́ни назира́ти благохва́лящия тя,/ ве́мы бо тя дерзнове́нна хода́тая,/ и непосты́дна засту́пника за ны, и моли́твенника.

Богоро́дичен:

Невестоводи́тельнице, Мари́е Пречи́стая,/ предобруче́нныя Сы́ну и Бо́гу Твоему́ приле́жно соблюди́,/ и вся ча́да церко́вная спаси́ и сохрани́,/ Тя бо и́мамы предста́тельство ве́рных и утвержде́ние.

Конда́к, глас 3:

Днесь све́тло лику́ет оби́тель Стефа́нова,/ возрасти́вшая вели́каго святи́теля,/ чудотво́рца ди́внаго Варлаа́ма,/ той бо ве́лия ве́ры о́браз яви́ся,/ егда́ бо во оскуде́нии хле́бнем преподо́бному Стефа́ну моля́шеся,/ чу́до Госпо́дь сотвори́,/ во е́же напита́ти бра́тию и мно́гия лю́ди./ Те́мже мы, дивя́щеся таково́му упова́нию, вопие́м:/святи́телю о́тче преподо́бне,/ испроси́ нам у Бо́га ве́ру несумне́нную// и спасе́ние душа́м на́шим.

И́кос:

Ка́я благодаре́ния принесе́м тебе́, святи́телю?/ Ки́ими похвала́ми, достохва́льне, венча́ем по́двиги твоя́?/ Оба́че, ра́дуйся, тебе́ взыва́ем, Варлаа́ме,/ ра́дости духо́вныя исполня́еми, си́це вопию́щии:/ Ра́дуйся, служи́телю Пресвяты́я Тро́ицы,/ ра́дуйся, избра́нниче Цари́цы Богоро́дицы;/ ра́дуйся, оби́тели Ма́хрищския украше́ние,/ ра́дуйся, и́ночествующих богодарова́нное утеше́ние;/ ра́дуйся, треволне́нии жите́йскими потопля́емым упра́вителю и ко́рмчий,/ра́дуйся, Варлаа́ме, изря́дный чудотво́рче;/ испроси́ наму Бо́га ве́ру несумне́нную и спасе́ние душа́м на́шим.

Песнь 7

Ирмо́с: Тебе́, у́мную, Богоро́дице, пещь/ разсмотря́ем, ве́рнии:/ я́коже бо о́троки спасе́ три Превозноси́мый,/ мир обнови́, во чре́ве Твое́м всеце́л,// хва́льный отце́в Бог и препросла́влен.

Неприча́стен ника́коже скве́рны яви́вся грехо́вныя,/ неботе́чною стезе́ю в Го́рний Сио́н восте́кл еси́,/ те́мже, святи́телю, ны́не вопие́ши:/ отце́в Бо́же, благослове́н еси́.

О́ле та́инства стра́ннаго! О́ле зна́мения чу́днаго!/я́ко дре́вле честны́я мо́щи Стефа́на вели́каго/Христо́с, прославля́яй святы́я Своя́, Варлаа́му яви́,/та́ко и ны́не всера́достное торжество́ преподо́бнаго отца́ усугу́би:/ многоце́нныя бо мо́щи ученика́ его́ просла́ви, да вси пое́м:/ отце́в Бо́же, благослове́н еси́.

Единонра́вен и соревни́телен быв преподо́бным,/ Еди́ницу Несозда́нную, треми́ ли́цы разделя́ему,/ святи́телю, воспе́л еси́:/ отце́в Бо́же, взыва́я, благослове́н еси́.

Преподо́бне, треблаже́нне, святи́телю Варлаа́ме,/ не сокры́вый души́ твоея́ любому́дрыя ни еди́ный тала́нт,/ да́ры, да́нныя ти, преумно́жил еси́./ И ны́не воздви́гни нас, да ле́ность отря́сше, неосужде́нно воспое́м:/ отце́в Бо́же, благослове́н еси́.

Ри́зу души́ твоея́ доброде́тельми истка́в, достохва́льне,/ Оде́ющагося све́том, я́ко ри́зою, луча́ многосве́тлая показа́лся еси́,/ и просвеща́еши Тому́ пою́щия:/ отце́в Бо́же, благослове́н еси́.

Богоро́дичен:

Мари́е, Христо́вых чуде́с красото́ и нача́ло,/ Мари́е Богоневе́стная, оправда́ние дще́рей земли́,/ Мари́е, А́гнца и Па́стыря ми́ру яви́вшая,/ спаси́ вопию́щия Сы́ну и Бо́гу Твоему́:// отце́в Бо́же, благослове́н еси́.

Песнь 8

Ирмо́с: В пещи́ о́троцы Изра́илевы,/ я́коже в горни́ле,/ добро́тою благоче́стия чисте́е зла́та блеща́хуся, глаго́люще:/ благослови́те, вся дела́ Госпо́дня, Го́спода,// по́йте и превозноси́те во вся ве́ки.

Испыта́нием ве́лиим яри́ся враг погуби́ти оби́тель твою́,/ и безча́дну, и ме́ртву яви́ти, Варлаа́ме,/ оба́че посрами́ся всезло́бный, поне́же па́ки испо́лнися о́ная чад,/ и во сла́ве воста́вши, воспева́ет си́це:/ Го́спода по́йте, дела́, и превозноси́те Его́ во ве́ки.

Не устыди́шася Бо́га неблагода́рнии лю́дие безу́мнии,/ оскверни́ти шата́ющеся достоя́ние и гро́бы святы́х./ Но, о Христо́вы подо́бницы, Стефа́не и Варлаа́ме, дво́ице богому́драя,/ всепроще́нием ва́шим нас науча́ете пе́ти:/ Го́спода по́йте, дела́, и превозноси́те Его́ во ве́ки.

Отца́ но́ваго тебе́ имену́ем, святи́телю,/ оби́тели бо Тро́ицы Пресвяты́я благоукраси́тель и засту́пник яви́лся еси́,/ сего́ ра́ди, ча́да твоя́, торжеству́юще вопие́м:/ Го́спода по́йте, дела́, и превозноси́те Его́ во ве́ки.

Ше́ствовати стезе́ю доброде́телей хотя́щих,/ в братолю́бнем еди́нстве Христо́вы любве́ утверди́, да вопие́м:/ Го́спода по́йте, дела́, и превозноси́те Его́ во ве́ки.

Богоро́дичен:

Ада́ма па́дшаго, Богоро́дице Де́во, воззва́ние,/ в ров поги́бельный па́дшаго мя воззови́,/ и мольба́ми Твои́ми горе́ возведи́, и сподо́би всера́достно пе́ти:/ Го́спода по́йте, дела́,  и превозноси́те Его́ во ве́ки.

Песнь 9

Ирмо́с: О́браз чи́стаго рождества́ Твоего́/  огнепали́мая купина́ показа́ неопа́льная;/ и ны́не на нас напа́стей свире́пеющую угаси́ти, мо́лимся, пещь,/ да Тя, Богоро́дице,// непреста́нно велича́ем.

Его́же сла́вы присносу́щныя соприча́стник яви́лся еси́, Варлаа́ме,/ Его́же кро́ткий лик узре́ти сподо́бился еси́,/ Того́ моли́, мир лю́дем Свои́м низпосла́ти,/ и пою́щия тя уще́дрити и спасти́.

На земли́ обетова́нней водворя́яся ны́не, блаже́нне,/ нас, стра́нников во юдо́ли плаче́вней, Варлаа́ме, помяни́,/ да возмо́жем тече́ние свое́ до́бре соверши́ти,/ покрыва́емии благослове́нием и предста́тельством твои́м.

Иму́ще, ве́рнии, такова́го архипа́стыря и хода́тая,/ свети́льника ве́ры, Стефа́нова сонасле́дника,/ не вознеради́м у́бо, о и́ноцы,/ но благодаря́ще облобыза́ем честны́я мо́щи святи́теля, взыва́юще:/ не премолчи́, Варлаа́ме, за ны ко Го́споду!

Ели́ки труды́ подъя́л еси́ на земли́, свя́тче Бо́жий,/ ели́ких святы́х хода́тай сла́вы показа́лся еси́!/ Си́це и мы, я́ко ма́лую ле́пту, тебе́, Варлаа́ме, ны́не прино́сим/ труд смире́нных усте́н, песнопе́вцы и ча́да твоя́.

Богоро́дичен:

Чинонача́лий го́рних вы́шши яви́лася еси́, Богоро́дице,/ над все́ми бо Ца́рствующаго во объя́тиях Твои́х носи́ла еси́,/ у Него́же пода́ти грехо́в оставле́ние всем нам испроси́.

Свети́лен святи́теля, глас 1:

Возсия́ днесь пресла́вное торжество́,/ честна́я па́мять богому́драго святи́теля Варлаа́ма,/ сего́же  пра́зднества приобщи́тися нас сподо́бивый, Го́споди, сла́ва Тебе́.

Сла́ва, и ны́не, Богоро́дицы.

На хвали́тех, стихи́ры Богоро́дицы,

и стихи́ры святи́теля, глас 1.

Подо́бен: Небе́сных чино́в:

Небе́сным чино́м удивле́ние,/ земны́м удо́лием ра́дование,/ похвалу́ оби́тели Ма́хрищския, вертогра́да Стефа́нова,// святи́теля Варлаа́ма пе́сньми почти́м.

Небе́сным чино́м поревнова́л еси́,/ во пло́ти ме́ртвенней а́ки безпло́тен пребыва́я,/ Боже́ственною же добро́тою оде́яна ве́дуще,// тя, Варлаа́ме, ублажа́ем.

Небе́сных чино́в сонасле́дниче,/ святи́телю Христо́в Варлаа́ме,/ в час испыта́ния бу́ди нам заступле́ние,// честно́е твое́ пра́зднующим успе́ние.

Сла́ва, святи́теля, глас 2:

Воспе́л еси́ Цари́це Богоро́дице/ песнь славосло́вия досто́йно, Варлаа́ме, в житии́,/ имы́й Ти́хвинскую ико́ну Ея́/ вы́ну пред очи́ма твои́ма;/ мы же почита́ние честна́го сего́ о́браза Пречи́стыя,/ я́ко святи́тельское твое́ благослове́ние прие́млюще,/превозно́сим Благослове́нную в жена́х,// тебе́ же, избра́нника Ея́, велича́ем.

И ны́не, Богоро́дичен, глас то́йже:

Яви́ и нам уничиже́нным, о Влады́чице,/ во мгле неве́дения су́щим на земли́,/ позна́ние пути́ спасе́ния ве́чнаго,/ и́мже достиго́ша Ца́рствия Небе́снаго// и позна́ша Го́спода избра́ннии Твои́.

Славосло́вие вели́кое. Отпу́ст.

На Литурги́и слу́жба Богоро́дицы и святи́теля.

Моли́тва

святи́телю Варлаа́му, епи́скопу Су́ждальскому и Тару́сскому, Ма́хрищскому чудотво́рцу

О преизя́щный и преди́вный чудотво́рче земли́ Влади́мирския, Ма́хрищския оби́тели похвало́, святи́телю Христо́в, о́тче Варлаа́ме! Ты от ю́ности твоея́ мир су́етный возненави́дел еси́, и рабо́тати Го́сподеви возжеле́в, во оби́тель Тро́ицкую всели́лся еси́, иде́же неле́ностно в труде́х, бде́ниих и моли́твах подвиза́яся, был еси́ наста́вник мона́шествующих, всем же лю́дем учи́тель ре́вностный, и́го бо Христо́во со тща́нием нося́, за́поведи Того́ соверше́нне испо́лнил еси́. Те́мже град Су́ждаль, в не́мже святи́тельствовати от Бо́га сподо́бился еси́, о тебе́ хва́лится ны́не, мы же, недосто́йнии, ве́рою и любо́вию па́мять твою́ чту́ще и неотсту́пно ра́це твое́й предстоя́ще, воспева́ем ти: ра́дуйся, я́ко житие́м твои́м яви́лся еси́ ве́ры сокро́вище некра́домое, любве́ пучи́но неисчерпа́емая, наде́жды бога́тство несумне́нное, чистоты́ зерца́ло непоро́чное, по́стников кре́посте необори́мая, подвигополо́жников украше́ние неувяда́емое, святи́телей удобре́ние пресла́вное, сладкопе́сневый пропове́дниче сло́ва Бо́жия. Ны́не же Небе́сному Царю́ предстоя́, святи́телю о́тче Варлаа́ме, моли́ся Ему́, е́же уще́дрити ме́сто селе́ния твоего́, святу́ю оби́тель сию́, иде́же ду́хом любве́ твоея́ всегда́ пребыва́еши; нас же, немощны́х, с ве́рою и любо́вию к ра́це моще́й твои́х припа́дающих, жезло́м бла́гости, я́коже па́стырь до́брый, упаси́, огражда́я от собла́знов, ересе́й и раско́лов и вся́кого зла, да твоему́ святи́тельскому гла́су после́дующе, дости́гнем Небе́снаго Ца́рствия, иде́же ку́пно с тобо́ю воспое́м и просла́вим пречестно́е и́мя Отца́ и Сы́на и Свята́го Ду́ха, во ве́ки веко́в. Ами́нь.


[1] Варлаам – сын Божий (халд.)